Ի սկզբանե համոզված եմ եղել, որ Ռ. Քոչարյանի «Կյանք և ազատություն» գիրքն ինձ համար, ինչու չէ նաև յուրաքանչյուր արցախցու համար առանձնակի նշանակություն է ունենալու և այնտեղ գտնելու եմ ինձ համար շատ կարևոր ու թանկ տողեր։ Բնականաբար այդպես էլ եղավ՝ հատուկ ոգևորությամբ ու հուզականությամբ ընկղմվեցի գրքի հատկապես Ղարաբաղյան պատերազմին նվիրված հատվածի մեջ՝ երկարատև պայքար, Շուշիի ազատագրում, հաղթանակներ, զինադադար, երկար սպասված խաղաղություն, անկախություն, ազատություն... Գիրքը հետաքրքիր է նաև այն առումով, որ պատմում է ոչ միայն Արցախի առաջին, Հայաստանի երկրորդ Նախագահի կյանքի ու գործունեության, անցած ուղու մասին, այլ նաև, որ դրանում նկարագրված է մեր նորագույն պատմության մի ամբողջ՝ շատ կարևոր ու բարդ ժամանակաշրջան՝ իր պատմական հաղթանակներով, հետպատերազմյան դժվարություններով ու մեծ ձեռքբերումներով հանդերձ։ Այն կարծես մեր ժողովրդի պայքարի ու դրա արդյունքում կերտած անկախության ու ազատության պատմության մի հատվածը լինի։ Կարծում եմ՝ Հայաստանի ու Արցախի նորագույն պատմությամբ, քաղաքականությամբ, ինչու չէ նաև դիվանագիտությամբ հետաքրքրված յուրաքանչյուրի համար կարևոր կլինի գրքի ընթերցումն այն առումով, որ հետաքրքիր է հետևել մեր երկրի նորագույն պատմության անդրադարձին մի մարդու աչքերով, որը մեծ դեր է ունեցել երկրի համար կարևոր ու ճակատագրական գործընթացներում։ Որպես գրքի գլխավոր առավելություն՝ կարելի է նշել, որ այն կարդացվում է մեկ շնչով, շարադրված է առանց ավելորդ էմոցիաների ու պոպուլիզմի, այն կարծես յուրատեսակ երկխոսություն լինի հեղինակի ու ընթերցողի միջև։ Համոզված եմ՝ շատերը, կարդալով այն, կգտնեն իրենց՝ գրքի որոշակի դրվագների ինչ-որ տողերում... Գրքի ընթերցումը ևս մեկ անգամ վերահաստատեց Ռ. Քոչարյանի՝ որպես հզոր, արժանապատիվ, կամային ուժեղ հատկանիշներով տեր մարդու, պայքարողի, զինվորի, պետականամետ մեծ հայրենասերի ու փորձառու քաղաքական գործչի տեսակը... Համոզված եմ, որ գիրքն անպայման պետք է ունենա շարունակություն և նույնքան համոզված եմ, որ այն կլինի անչափ ցանկալի ու հետաքրքիր զարգացումներով լի...»։